„Beygjan að brautinni var alltof skörp“

Mikael Tryggvason, bróðir Péturs Tryggvasonar, annars þeirra sem fórust þegar sjúkraflugvél Mýflugs brotlenti við Hlíðarfjallsveg í ágúst, segir frásögn sjónarvotta og myndbandsupptökur af slysinu ekki ríma við bráðabirgðaskýrslu sem Rannsóknarnefnd samgönguslysa sendi frá sér í október. Hann hyggst óska opinberrar rannsóknar á tildrögum og eftirmálum slyssins.

Í skýrslunni segir að flugvélin hafi misst hæð í vinstri beygju þegar hún nálgaðist akstursbraut Bílaklúbbs Akureyrar og að vinstri vængur vélarinnar hafi snert jörð við hægri hlið brautarinnar með þeim afleiðingum að hún brotlenti. Mikael segir kröfu um rannsókn meðal annars byggjast á hagsmunum tveggja barna sem Pétur skilur eftir sig.

„Það virðist vera svo margt sem ekki passar í þessu ferli öllu,“ segir Mikael, en Fréttablaðið hefur umræddar myndbandsupptökur undir höndum. Þær eru hluti gagna sem safnað hefur verið fyrir aðstandendur Péturs. Virðist af þessum myndskeiðum að flugvélin sé ekki að „missa hæð“ í venjulegum skilningi þess orðs.

„Eftir því sem kunnáttumenn segja mér er flugvélin að fljúga, hún er ekki að missa hæð heldur lækkar flugið í krappri beygju. Rannsókn á slysum er fyrst og fremst til að komast að því hvað gerðist og að fyrirbyggja að slíkt eigi sér stað aftur. Til þess þarf skýrslan að vera rétt,“ segir Mikael.

„Flugstjórinn var gjaldkeri Bílaklúbbs Akureyrar og hann var búinn að boða komu sína á keppnisstaðinn eftir flugið. Hann flaug lágt meðfram fjallinu, líklega til þess að ekki sæist til hans fyrr en vélin myndi birtast allt í einu. Beygjan yfir hesthúsahverfinu að brautinni var alltof skörp og halli flugvélarinnar um 70 gráður.“

„En það er stór þáttur í þessu líka að Pétur bróðir minn var að búa til viðbragðsáætlanir gagnvart slysum og óhöppum og það var ætlast til að það væri farið eftir þeim. Þarna virðist svo margt vera sem ekki passar varðandi slysið og umgjörðina alla,“ segir Mikael og nefnir meðal annars boðun björgunarmanna. „Það þýðir ekki að hafa nýjar og fínar viðbragðsskýrslur uppi í hillu og fara svo ekkert eftir þeim.“

Þá segir Mikael að hafa verði í huga ríka almannahagsmuni þegar sjúkraflug sé annars vegar. Beina þurfi sjónum í opinberri rannsókn að rekstri Mýflugs á sjúkrafluginu og þætti eftirlitsaðila. „Það var svo margt sem var talið eðlilegt en á ekki heima í þessum bransa og á ekki að líðast. Sjúkraflug er dauðans alvara,“ segir hann.