NBA í nótt: Golden State felldi meistarana

Golden State Warriors vann sinn sjöunda leik í röð í NBA-deildinni í körfubolta í nótt eftir góðan sigur á meisturum Miami Heat, 123-114.

Stephen Curry var sjóðheitur í leiknum og skoraði 36 stig, þar af setti hann niður átta þriggja stiga körfur í fimmtán tilraunum.

David Lee var með 32 stig og tók fjortán fráköst þar að auki en Klay Thompson bætti við sextán stigum.

Hjá Miami var LeBron James stigahæstur með 26 stig og Dwayne Wade skoraði 22. En það var Golden State sem var sterkari á flestum sviðum í leiknum enda liðið með bæði betri skotnýtingu og fleiri fráköst.

Golden State er nú komið upp í sjötta sæti Vesturdeildarinnar og hefur unnið 21 af 34 leikjum sínum.

Brooklyn vann Oklahoma City, 95-93, sem tapaði þar með sínum öðrum heimaleik í röð. Joe Johnson tryggði Brooklyn sigurinn með flautukörfu en gestirnir frá New York höfðu átt frábærar lokamínútur eftir að hafa lent mest sextán stigum undir í síðari hálfleik.

Deron Williams skoraði 29 stig, þar af átján í síðari hálfleik. Paul Pierce bætti við átján stigum. Kevin Durant var stigahæstur hjá Oklahoma City með 24 stig en þetta var fjórði leikur liðsins í röð án Russell Westbrook, sem er meiddur.

New York Knicks vann San Antonio, 105-101, og fullkomnaði þar með kvöldið fyrir New York-búa. Imam Shumpert skoraði 27 stig og bætti þar með persónulegt met en Carmelo Anthony var með 27 stig og tólf fráköst.

Cleveland vann Orlando, 87-85, í framlengdum leik. Anderson Varejao tryggði sigurinn með tveimur mikilvægum körfum í framlengingunni en hann tók alls 25 fráköst í leiknum sem er félagsmet hjá Cleveland. Kyrie Irving missti af leiknum vegna hnémeiðsla.

Úrslit næturinnar:

Cleveland - Orlando 87-81

Miami - Golden State 114-123

Chicago - Boston 94-82

Oklahoma City - Brooklyn 93-95

San Antonio - New York 101-105

Phoenix - Memphis 91-99

Utah - Milwaukee 96-87

Portland - Charlotte 134-104

Sacramento - Philadelphia 104-113