Snorri: Okkar slakasti leikur í keppninni

"Þetta var allt of spennandi í lokin. Það var meira út af okkar klaufaskap frekar en eitthvað annað. Við héldum að þetta væri komið og duttum í sama pakka og í byrjun leiks," sagði leikstjórnandinn Snorri Steinn Guðjónsson eftir sigurinn fína á Makedóníu.

"Við keyrðum ekki á þá í upphafi eins og við ætluðum. Það er alveg klárt. Þetta var nákvæmlega byrjunin sem þeir vildu fá. Þeir fengu smjörþefinn strax í upphafi og þá geta þeir verið erfiðir við að etja.

"Við urðum að spýta í lófana og gera þetta eins og menn. Við réttum úr kútnum og förum inn í hlé með fínt forskot. Svo gerist það sama í upphafi seinni hálfleiks sem var pirrandi.

"Þetta var alls ekki frábær leikur hjá okkur og ég efast um að það hafi verið frábært að horfa á þetta. Þetta var líklega okkar slakasti leikur í keppninni en það spilar auðvitað inn í að þetta var fimmti leikurinn og menn orðnir þreyttir.

"Engu að síður gaman að rúlla liðinu áfram mjög vel. Það gæti orðið mikilvægt ef við förum í leikinn um fimmta sætið. Ef það hefði verið sagt fyrir mót að við myndum spila um fimmta sætið þá hefðu allir sagt að það væri frábær árangur. Auðvitað vill maður meira en það væri samt flottur árangur."