Hélt leik áfram eftir að hafa fengið sex villur

Sá furðulegi atburður átti sér stað í NBA-deildinni í nótt að leikmaður LA Lakers fékk að halda áfram leik eftir að hafa fengið sex villur.

LA Lakers vann Cleveland Cavaliers, 119-108, en aðeins voru átta leikmenn á leikskýrslu Lakers í leiknum.

Þegar þrjár og hálf mínúta var eftir af leiknum fékk Robert Sacre, leikmaður LA Lakers sína sjöttu villu. Venjulega væri þátttaka hans í leiknum þá lokið en svo var ekki í nótt.

Lakers hafði engan annan leikmann til að koma í hans stað af bekknum. Chris Kaman hafði áður fengið sex villur og í framhaldinu útilokun frá leiknum.

Jordan Farmar og  Nick Young meiddust í leiknum og þurftu að yfirgefa völlinn.

Þetta hafði það í för með sér að Lakers fékk dæmda á sig tæknivillu en Robert Sacre hélt leik áfram samkvæmt reglum NBA-deildarinnar.