Janúkovítsj sagður á heilsuhæli í Rússlandi

Viktor Janúkovítsj, fyrrverandi forseti Úkraínu, er sagður dveljast á heilsuhæli rétt fyrir utan Moskvu. Þetta hefur AP-fréttastofan eftir rússneska fjölmiðlinum RBK.

Öryggisgæsla er sögð hafa verið óvenju mikil í kringum hótel í borginni, þar sem Janúkovítsj er sagður hafa dvalið áður. Lögreglumenn fylgdust með úr bílum sem lagt var fyrir utan hótelið og öryggisverðir stóðu í anddyrinu. Þá er einnig greint frá því að sést hafi til bandamanna forsetans fyrrverandi á hótelinu.

Janúkovítsj hefur ekki sést meðal almennings síðan á laugardag og segjast yfirvöld í Rússlandi ekki hafa neinar upplýsingar um afdrif hans.

Oleksandr Túrtsjínov hefur tekið við sem bráðabirgðaforseti Úkraínu eftir að Janúkovítsj hrökklaðist úr embætti í kjölfar mikilla átaka í síðustu viku.