Massa verður með stafi Schumachers á hjálminum

Brasilíumaðurinn Felipe Massa, ökuþór Williams í Formúlu 1, verður með stafina „MS“ áletraða á hjálminum þegar fyrsta keppni tímabilsins fer fram í Ástralíu á sunnudaginn.

Stafirnir standa vitaskuld fyrir MichaelSchumacher sem liggur í dái á spítala í Frakklandi eftir hræðilegt skíðaslys eins og allir vita.

Massa var samherji Schumachers hjá Ferrari en Þjóðverjinn er sjöfaldur heimsmeistari í Formúlu 1 og einn sá albesti sem nokkurn tíma hefur keppt í Formúlunni.

„Michael er alltaf með mér. Vertu sterkur, bróðir. Ást,“ skrifaði Massa á Twitter-síðu sína en hann ræddi svo málið enn frekar við blaðamenn í gær.

„Ég hugsa um Schumacher á hverjum degi og bið fyrir honum. Ég vona svo sannarlega að það verði í lagi með hann. Það er synd hvað kom fyrir en ég held áfram að hugsa til hans,“ sagði Felipe Massa.

„Hann verður á hjálminum mínum og ég held áfram að biðja fyrir honum,“ bætti hann við.

Formúlan verður í beinni útsendingu á Stöð 2 Sport en útsending frá tímatökunum hefst klukkan 5:50 á laugardagsmorgun. Keppnin sjálf er svo á dagskrá klukkan 5:30 á sunnudagsmorgun.