Starbucks selur áfengi í þúsundum útibúa

Fyrirtækið Starbucks mun á næstunni hefja áfengissölu á þúsundum útibúa. Breytingarnar munu taka einhver ár samkvæmt Troy Alstead hjá Starbucks, en meðal þess sem bæta á við á matseðilinn eru beikonvafðar döðlur og léttvín.

Sagt er frá þessu á vef Buisnessweek.

Starbucks hefur á undanförnum árum lagt aukna áherslu á að selja vörur eins og safa, te og mat til að auka vöxt fyrirtækisins í Bandaríkjunum. Í fyrsta sinn sem Starbucks seldi áfengi var árið 2010 í Seattle og í janúar 2012 hóf fyrirtækið tilraunaáfengissölu í 25 útibúum í Chicago, Atlanta og Suður-Kaliforníu.

Fyrirtækið tilkynnti í gær langtíma áætlun sem gengur út að nærri tvöfalda markaðsvirði fyrirtækisins. Fyrr í þessum mánuði kom í ljós að fyrirtækið vinnur að því að kaupendur geti pantað kaffi með snjallsímum áður en þau koma að afgreiðsluborðinu.