Barcelona má ekki kaupa leikmenn næsta árið

Alþjóðaknattspyrnusambandið, FIFA, hefur refsað stórliði Barcelona fyrir að brjóta reglur um félagskipti ungmenna og bannað félaginu að kaupa leikmenn næsta árið.

Þessi ótrúlegu tíðindi bárust frá FIFA nú í morgun en í tilkynningu sambandsins segir að Barcelona hafi brotið reglur um félagaskipti erlendra leikmanna undir átján ára aldri.

Rannsókn hefur staðið yfir undanfarið ár og er niðurstaða FIFA að bæði spænska knattspyrnusambandið og Barcelona hafi brotið þó nokkrar reglur sem gilda hjá sambandinu um skráningu erlendra leikmanna undir átján ára aldri.

Brotin áttu sér stað frá 2009 til 2013 og nær til tíu leikmanna. Barcelona var enn fremur sektað um jafnvirði 57 milljóna króna og spænska sambandið um 63,5 milljónir.

Áfallið er mikið fyrir Barcelona enda félagið til að mynda nýbúið að missa aðalmarkvörð sinn, Victor Valdes, í alvarleg meiðsli. Samningur hans við félagið rennur út í lok tímabilsins og hafði hann í hyggju að leita á önnur mið.

Félagaskiptabannið nær yfir næstu tvo glugga, það er að segja nú í sumar og í janúar næstkomandi. Barcelona verður því ekki heimilt að kaupa nýjan leikmann til félagsins fyrr en sumarið 2015.

Þetta er ekki fyrsta hneykslið sem skekur Barcelona í vetur en fyrir skömmu síðan sagði forseti félagsins, Sandro Rosell, af sér þegar upp komst að félagið hafi ekki greint rétt frá öllum samningsatriðum þegar það keypti Brasilíumanninn Neymar í sumar. Málið var tekið fyrir spænska dómskerfinu enda félagið grunað um stórfelld skattsvik.

Barcelona greiddi hins vegar spænska skattinum sjálfviljugt um tvo milljarða króna og óvíst hvort það nægi til að ljúka málinu.