„Ég túlka þögn forystunnar þannig að ég eigi að fá að sigla þessu skipi í höfn“

Sveinbjörg Birna Sveinbjörnsdóttir, oddviti lista Framsóknar og flugvallarvina í borgarstjórnarkosningunum, hefur ekkert heyrt í Sigmundi Davíð Gunnlaugssyni eða forystu Framsóknarflokksins vegna ummæla sinna um afturköllun lóðar til Félags múslima.

Ummælin hafa reynst afar umdeild, og hafa af mörgum verið túlkuð sem dekur við andúð á innflytjendum. Ibrahim Sverrir Agnarsson, formaður Félags múslima hefur lýst yfir sárum vonbrigðum með ummælin og hefur formlegrar afstöðu formanns eða þingflokks verið beðið. Sigmundur Davíð Gunnlaugsson forsætisráðherra og formaður Framsóknarflokksins hefur komið sér hjá því að tjá sig um málið. Nú liggur fyrir að ekkert hefur verið fjallað um þetta mál millum þeirra Sveinbjargar Birnu og Sigmundar Davíðs eða forystu flokksins. Sigmundur Davíð sagði í samtali við Vísi fyrr í dag að hann hafi ekki sett sig inn í málið.

„Ég túlka þögn forystunnar þannig að ég eigi að fá að sigla þessu skipi í höfn,“ segir hún í samtali við Vísi. Og heldur áfram: „Og ég þakka þeim þetta traust sem mér er sýnt með þessu.“

Sveinbjörg Birna sendi fyrir skömmu frá sér tilkynningu og í henni kemur fram að hún telji að sama eigi yfir alla að ganga þegar um lóðaúthlutanir til trúarhópa eru annars vegar. Þetta þýðir, í ljósi umdeildra ummæla hennar að hún vilji láta afturkalla lóðarúthlutun til Félags múslima; að lóð sem var Ásatrúarfélagið fékk einnig úthlutað eigi einnig að afturkalla.

Viltu þá afturkalla allar lóðarúthlutanir til trúfélaga?

„Ég vil að minnsta kosti setja þetta allt í íbúakosningu,“ svarar hún spurningu Vísis.

Virðir tjáningarfrelsi utanríkisráðherra

Sveinbjörg Birna segist hafa séð ummæli Sigrúnar Magnúsdóttur, þingflokksformanns Framsóknar og Gunnars Braga Sveinssonar utanríkisráðherra en bæði hafa þau sagt að að skoðanir hennar varðandi lóðarúthlutunina endurspegli ekki stefnu flokksins. Fleiri Framsóknarmenn hafa lýst því yfir að þeir séu ósammála Sveinbjörgu, til dæmis leiðtogar flokksins í Fljótsdalshéraði og í Reykjanesbæ .

„Já, Framsóknarflokkurinn er stór flokkur og innan hans rúmast mörg mismunandi sjónarmið.“

En hvað finnst þér um þessi ummæli Gunnars Braga og Sigrúnar?

„Ég virði tjáningarfrelsi þeirra, alveg eins og ég vona að þau virði tjáningarfrelsi mitt. Þau hafa fullan rétt á að hafa sína skoðun á þessu,“ svarar Sveinbjörg.

Lóðaúthlutun til ásatrúarmanna gangi til baka

Viðbrögð við yfirlýsingu Sveinbjargar Birnu hafa verið mikil og þannig sendu ásatrúarmenn fram opinbera fyrirspurn til oddvitans og spurðu hvort hún vildi draga til baka lóðarúthlutun til þeirra líka, en þeir eru í sömu sporum og múslimir; hafa fengið lóð en byggingarframkvæmdir eru ekki hafnar.

Svar barst frá Sveinbjörgu Birnu á fjórða tímanum í dag í áðurnefndri yfirlýsingu: „Ég hef talað um að ég sé á móti ókeypis úthlutun lóða til trúfélaga og í því miði eigi jafnt yfir alla að ganga.  Ég hef einnig talað um að ég telji að borgarbúar eigi í krafti lýðræðis að fá að eiga síðasta orðið í borgaralegri leynilegri atkvæðagreiðslu, hvort að slíkar úthlutanir eigi yfirhöfuð að eiga sér stað.  Þá tel ég eðlilegt að Alþingi taki það upp að endurskoða lög nr. 35/1970 um Kristnisjóð þar sem segir í 5. gr.  „Sveitarfélögum kaupstaða og kauptúna er skylt að leggja til ókeypis lóðir undir kirkjur og undanskilja þær gatnagerðargjaldi.“