Fisher orðaður við Lakers og Knicks

Hinn 39 ára gamli Derek Fisher er búinn að leggja skóna á hilluna en hann þarf ekki að hafa áhyggjur af verkefnaskorti.

Hann er orðaður við þjálfarastöðuna hjá bæði LA Lakers og NY Knicks. Það sem meira er þá er NBA búið að sekta Phil Jackson, forseta Knicks, um tæpar 3 milljónir króna fyrir að reyna við Fisher meðan hann var enn að spila.

Jackson lét aðeins hafa eftir sér að Fisher væri á meðal þeirra manna sem Knicks væri að skoða en þeir þekkjast vel frá þeim tíma er Jackson þjálfaði Fisher hjá Lakers.

Sjálfur býr Fisher í Los Angeles með fjölskyldu sinni og hann viðurkennir að hafa ekki hugmynd um hvaða skref hann tekur næst.