Villegas hafði sigur á Wyndham meistaramótinu

Kólumbíumaðurinn Camilo Villegas sigraði á Wyndham meistaramótinu sem kláraðist í kvöld en hann lék hringina fjóra á Sedgefield vellinum á samtals 17 höggum undir pari. Lykillinn að sigrinum hjá Villegas var frábær lokahringur upp á 63 högg eða sjö undir en þetta er í fjórða sinn sem hann sigrar í móti á PGA-mótaröðinni á ferlinum.

Lokahringurinn var mjög spennandi en margir kylfingar voru í baráttu um sigurinn allt fram á lokaholurnar.

Freddie Jacobson og Bill Haas deildu öðru sætinu á 16 höggum undir pari en Heath Slocum endaði einn í fjórða sæti á 15 undir.

Nick Watney, sem leiddi fyrir lokahringinn, fann sig ekki í dag og kom inn á 70 höggum eða pari. Hann endaði mótið á 14 undir og þurfti að sætta sig við fimmta sætið ásamt Brandt Snedeker og Webb Simpson.

Næsta mót á PGA-mótaröðinni er Barclays mótið en það er fyrsti liður af fjórum í Fed-Ex bikarnum. Þar mæta 125 stigahæstu kylfingarnir á PGA-mótaröðinni til leiks og berjast um gríðarlega háar fjárhæðir en spennandi verður að sjá hvort að einhver nær að skáka Rory McIlroy sem hefur verið sjóðandi heitur að undanförnu.