Ancelotti: Di Maria fer en ekki Khedira

Carlo Ancelotti knattspyrnustjóri spænska stórliðsins Real Madrid staðfesti við fjölmiðla að Angel di Maria sé á leið frá félaginu en hann sagði jafnframt að Þjóðverjinn Sami Khedira fari hvergi.

Eins og greint hefur verið frá er Argentínumaðurinn Angel di Maria á leið til Manchester United en Sami Khedira hefur líka verið orðaður við sölu frá Real Madrid.

„Di Maria kom til segja bless. Þetta er ekki frágengið ennþá en þetta er allt að verða klárt. Við þökkuðum honum fyrir allt sem hann hefur gert fyrir félagið og óskuðum honum góðs gengis,“ sagði Ancelotti við fjölmiðla í dag.

„Ég átti í mjög góðu sambandi við Di Maria. Hann stóð sig frábærlega fyrir Real Madrid. Við eigum mjög góða staðgengla fyrir hann.

„Þetta var hans ákvörðun vegna þess að félagið gerði allt hvað það gat til að halda honum. Við buðum honum allt sem við gátum. Hann valdi annað og gangi honum vel,“ sagði Ancelotti um Di Maria.

„Með Khedira, það hefur verið leyst. Hann verður hér áfram og það eru allir ánægðir með að það hafi verið leyst.

„Við erum með mikla breidd. Við eigum marga leikmenn á miðjunni,“ sagði Ancelotti um Khedira.