Þjálfarinn sáttur með sínar stúlkur

Bjarni Gíslason, einn þjálfara íslenska kvennalandsliðsins, sagði flest hafa gengið upp í úrslitunum á EM í hópfimleikum í Frjálsíþróttahöllinni í Laugardal í dag.

Íslensku stelpurnar stóðu sig með mikilli prýði en þurfu að sætta sig silfurverðlaun eftir að hafa unnið til gullverðlauna á síðustu tveimur mótum.

„Við fengum góða einkunn á öllum áhöldum, að okkur fannst. Frammistaða stelpnanna var mjög öflug og þetta var nákvæmlega eins og við plönuðum.

„Það gekk allt upp þannig séð, þótt það hafi verið vissir hnökrar hér og þar. En það skipti ekki það miklu máli,“ sagði Bjarni sem sagði íslenska liðið hafa verið að keppa við gríðarlega sterkt sænskt lið, sem fór heim með gullið.

„Við höfum alltaf keppt á móti þessum sterku sænsku liðum og gerðum það þegar við unnum gullið 2010 og 2012. Við höfum alltaf horft á sænska liðið sem mjög sterkan andstæðing. Þær áttu mjög góðan dag í dag og áttu sigurinn skilið,“ sagði Bjarni sem var ánægður með bætinguna frá forkeppninni á fimmtudaginn.

„Það var mikil bæting. Við löguðum nánast allt sem við ætluðum að laga og þær skiluðu þessu frábærlega,“ sagði þjálfarinn að lokum.