Flottustu tilþrifin á fyrsta kvöldi NBA-tímabilsins | Myndband

NBA-deildin í körfubolta hófst í gærkvöldi með þremur leikjum en sex lið fengu þar smá forskot á sæluna. Í kvöld fara síðan fram tólf leikir og síðan eru fjölmargir leikir á hverju kvöldi næstu mánuðina.

Anthony Davis, leikmaður New Orleans Pelicans, er spáð miklum frama í NBA-deildinni á þessari leiktíð og margir álíta hann sem einn af þremur bestu leikmönnum deildarinnar í dag.

Davis stóðst svo sannarlega pressuna í nótt en hann átti flottan leik í sigri New Orleans Pelicans. Anthony Davis var með 26 stig, 17 fraköst, 9 varin skot og 3 stolna bolta í leiknum.

Davis átti líka mörg flott tilþrif en þessi 208 sm framherji er léttur á fæti og með svaka faðm sem býður upp á glæsileg tilþrif eins og sjá má hér fyrir neðan.