Gay skrifar undir nýjan fimm milljarða samning

Körfuknattleikskappinn Rudy Gay mun eiga fyrir salti í grautinn næstu árin.

Hann er búinn að skrifa undir nýjan þriggja ára samning við Sacramento Kings sem mun færa honum fimm milljarða í aðra hönd.

Gay hefur verið lykilmaður í liði Kings en með hann í liðinu í fyrra þá vann liðið 21 leik en tapaði 35. Án hans var liðið 7-20.

Kings hefur farið vel af stað í vetur með árangurinn 6-4 og Gay er með 22,5 stig, 6,8 fráköst og 3,5 stoðsendingar að meðaltali í leik.