Hannes: Ég sakna Gulla smá

Hannes Þór Halldórsson, markvörður íslenska landsliðsins, hvíldi þegar Ísland mætti Belgíu í vináttulandsleik á miðvikudag en þeir Ögmundur Kristinsson og Ingvar Jónsson spiluðu hvor sinn hálfleikinn í Brussel.

„Ég naut þess að sitja og horfa á góðan fótboltaleik. Hinir markverðirnir styðja mig af fullum krafti þegar ég spila og nú snerist það við,“ sagði Hannes en viðtalið má sjá í heild sinni hér fyrir ofan.

Gunnleifur Gunnleifsson hefur verið fastamaður í íslenska landsliðshópnum undanfarin ár og verið varamarkvörður Hannesar í síðustu landsleikjum. Hann er þó ekki með liðinu nú.

„Við höfum átt virkilega gott samstarf og hann hefur stutt mig í gegnum súrt og sætt. Það hefði verið gaman að hafa hann hjá okkur enda hefur hann reynst mér vel í gegnum tíðina. Ég sakna hans smá.“

Hannes á eins og aðrir í íslenska landsliðinu von á erfiðum leik gegn Tékkum á morgun en segir erfitt að meta hvort það verði mikið að gera hjá honum.

„Maður veit aldrei á hverju er von fyrirfram en spilamennska okkar að undanförnu gefur ástæðu til bjartsýni, ekki síst varnarleikurinn. Við höfum haldið hreinu í þrjá leiki í röð og er það engin tilviljun. Liðið hefur verið virkilega þétt.“

Hann á von á jöfnum leik enda liðin áþekk. „Þeir virðast eiga slatta af vopnum í sínu vopnabúri en það eigum við líka. Við höfum lagst í skotgrafirnar þar sem við höfum varist vel og beitt skyndisóknum en líka spilað leik þar sem við erum meira með boltann. Gegn Tyrkjum var þetta beggja blands og ættum við því að eiga lausnir fyrir þennan leik.“

„Þetta gæti ráðist á smáatriðum og heppni. Við vitum að ef við sinnum okkar vinnu almennilega þá eru meiri líkur á því að sigurinn falli okkar megin.“

Varnarleikur Íslands hefur verið afar sannfærandi að undanförnu enda liðið ekki fengið á sig mark í fyrstu þremur leikjum undankeppninnar. Þó svo að Belgía hafi skorað þrívegis gegn Íslandi var það gegn gerbreytti varnarlínu sem þó hélt góðu skipulagi á löngum köflum.

„Það er ekki hægt að líkja því saman við að hafa götótta vörn fyrir framan sig. Það er ótrúlega þægileg tilfinning að hafa menn sem vita hvað þeir eru að gera og vinna hverja fyrir aðra.“

„Það er traustvekjandi tilfinning og þannig hefur það verið upp á síðkastið, eins og sást gegn Belgíu. Hver svo sem stígur inn þekkir sitt hlutverk.“

Hannes Þór hefur haldið marki íslenska liðsins hreinu síðan í vináttulandsleik gegn Austurríki fyrr á þessu ári - samtals í 332 mínútur. Og vitanlega í öllum þremur leikjum Íslands í undankeppninni í haust.

„Ég spái ekki mikið í svona tölfræði og er fyrst og fremst að hugsa um stigin. Möguleikar okkar á sigri aukast til muna ef við höldum hreinu og vonandi verður áframhald á því á morgun.“