Emil: Mætum auðmjúkir til leiks

Emil Hallfreðsson, sem hefur lítið getað æft í vikunni vegna bakmeiðsla, segist vera klár í slaginn fyrir leikinn gegn Tékklandi í undankeppni EM 2016 á morgun.

„Ég fékk smá tak í bakið og ég orðinn klár. Stebbi sjúkraþjálfari hefur unnið að því síðustu daga að koma mér í stand og gat ég æft á fullu í morgun,“ sagði Emil en viðtalið má sjá í heild sinni hér fyrir ofan.

„Þetta er í fyrsta sinn í mörg ár sem ég fæ eitthvað í bakið en væntanlega er þetta vegna uppsafnaðrar þreytu. En þetta er allt í góðu núna.“

Emil er spenntur fyrir leiknum á morgun og segist hafa verið búinn að bíða eftir honum undanfarinn mánuð. „Það verður gaman að fá að taka þátt í hálfgerðum úrslitaleik um toppsæti riðilsins á morgun.“

Hann segir að Tékkland sé með svipað lið og það íslenska - liðsheildin sé góð og menn duglegir. „Ég held því að þetta verði hörkuleikur á milli tveggja baráttuliða. Við höfum farið vel yfir okkar leikaðferðir og án þess að ég gefi mikið upp þá verður þetta örugglega svipað og í síðustu leikjum.“

„Við ætlum að taka vel á þeim og ef við erum klárir í þann slag þá getum við vel tekið þrjú stig heim til Íslands,“ segir Emil en skömmu fyrir viðtalið hafði hann veitt nokkrum tékkneskum knattspyrnuáhugamönnum eiginhandaáritun.

„Ég er ekki viss um að þeir vissu einu sinni hver ég væri. Þeir létu mig bara kvitta undir. Þetta er bara partur af þessu. Það eru allir með báða fætur á jörðinni sem skiptir öllu máli. Við mætum auðmjúkir til leiks og þá náum við úrslitum.“