Flugmaður easyJet snéri við yfir Keflavíkurflugvelli vegna óveðursins

Flugmaður easyJet treysti sér ekki til að lenda á Keflavíkurflugvelli vegna blindbyls í dag. Ákvörðunin var tekin þegar flugvélin var beint yfir Keflavík  en flugmaðurinn hringsólaði fyrir ofan flugvöllinn áður en hann snéri flugvélinni við og hélt aftur til Edinborgar þar sem hún tók á loft í morgun. Á svipuðum tíma var flugvél Norwegian snúið við.

Samkvæmt upplýsingum frá flugvélinu var flugvélinni snúið til Inverness í Skotlandi. Um borð eru 173 farþegar en langflestir þeirra eru breskir ferðamenn á leið til landsins. 

„Flugmaðurinn tók þá ákvörðun að lenda ekki og fljúga áfram,“ segir Guðni Sigurðsson, talsmaður Isavia, sem rekur Keflavíkurflugvöll. Hann segir flugvöllinn vera opinn en að það sé ákvörðun hvers og eins flugmanns um hvort lent sé. 

„easyJet getur staðfest að flug EZY863 frá Luton til Reykjavíkur 16. desember var snúið til Inverness, Skotlandi, vegna varhugaverðra veðuraðstæðna á Íslandi,“ segir í svari easyJet við fyrirspurn Vísis. „Öryggi og velferð farþega okkar og starfsmanna er alltaf í hæsta forgangi.“

Áætlað er að flogið verði frá Inverness síðar í dag og er vonast til að biðin í Skotlandi verði innan við klukkutími. „Við viljum biðja alla farþega okkar afsökunar á öllum óþægindum vegna seinkunarinnar,“ segir svo í svarinu.

Tvær flugvélar WOW air hafa lent á flugvellinum síðastliðna klukkustund og því ljóst að ekki er ógerlegt að lenda. Allar vélar WOW air sem áttu að lenda og taka á loft í Keflavík í dag eru lentar. Í morgun fengust þær upplýsingar frá Icelandair að ekki hafi verið hætt við nein flug félagsins í dag.

Guðni segir að einni annarri flugvél hafi verið snúið við.