Pepe gaf nágrönnum sínum níu tonn af mat

Pepe, varnarmaður Real Madrid og portúgalska landsliðsins, sýndi það og sannaði að hann er mikill mannvinur þegar hann kom færandi hendi til fátækra íbúa Las Rozas hverfisins í Madrid á Spáni.

Pepe, sem hefur fengið tólf rauð spjöld á ferlinum, er miklu þekktari fyrir tuddaaskap og æðisköst inn á vellinum en að taka að sér hlutverk miskunnsama Samverjans.

Pepe er 31 árs gamall og kemur sjálfur úr verkmannafjölskyldu í Brasilíu. Hann greiddi fyrir níu tonn af mat sem verður dreift til íbúa Las Rozas hverfisins svo þeir geti notið jólahátíðarinnar.  Pepe býr einmitt í hverfinu og vildi passa upp á það að nágrannar sínir gætu notið jólanna.

Þetta er heldur ekki í fyrsta sinn sem Pepe bregður sér í hlutverk jólasveinsins því í fyrra gaf hann fimm tonn af mat til íbúa Las Rozas hverfisins. Pepe mætti þá sjálfur til að láta fólkið í hverfinu fá sína matarpakka.

Pepe hefur spilað með Real Madrid frá árinu 2007 en hann hefur unnið átta titla með félaginu þar af Meistaradeildina í vor og spænsku deildina bæði 2008 og 2012.

Pepe verður í sviðsljósinu í kvöld þegar Real Madrid mætir Almeria í spænsku úrvalsdeildinni en leikurinn verður sýndur beint á Stöð 2 Sport. Leikurinn hefst klukkan 19.45. Þetta er síðasti leikur Real Madrid liðsins fyrir Heimsmeistarakeppni félagsliða í Marokkó.