Mér finnst ég vera með lið framtíðarinnar í höndunum

Það er komið að stóru stundinni og strákanna okkar bíður gríðarlega erfitt verkefni í fyrsta leik á morgun. Það eru frændur vorir Norðmenn sem hafa reynst okkur erfiður ljár í þúfu síðustu árin. Leikir þessara liða hafa oftar en ekki verið jafnir en sem betur fer hefur Ísland oftast unnið.

Liðin mættust á síðasta EM og þá vann Ísland sætan 34-32 sigur eftir að hafa lent í miklu basli og verið fjórum mörkum undir um tíma í síðari hálfleik.

Það má búast við álíka spennu á morgun í leik sem margir stilla upp sem úrslitaleik um hvort liðið kemst áfram í milliriðil. Það má ýmislegt segja um það en leikurinn er gríðarlega mikilvægur og má helst ekki tapast ef Ísland ætlar sér áfram í keppninni. Þetta er lykilleikur.

Þetta er lið framtíðarinnar

Norðmenn eru sem fyrr öflugir en þeir eru að byggja upp lið fyrir framtíðina.

„Mér finnst ég vera með lið framtíðarinnar í höndunum. Það þýðir ekki að liðið muni springa út á EM núna en á allra næstu árum á þetta lið að geta staðið í bestu liðunum,“ sagði hinn sænski þjálfari Norðmanna, Robert Hedin, en nokkur pressa er á honum.

Strákarnir hans stóðu sig mjög vel á æfingamóti í heimalandinu í byrjun nóvember. Þá unnu Norðmenn glæsilegan sigur á Dönum og töpuðu naumlega fyrir sterkum liðum Króatíu og Frakklands.

Ekki gekk eins vel hjá þeim á æfingamóti um síðustu helgi. Þá tapaði liðið með tólf marka mun fyrir Dönum og með sjö mörkum gegn Katar. Þeir sýndu þó í lokaleiknum hvað er spunnið í liðið með því að stríða Frökkum og tapa aðeins með einu marki. Það lyfti liðinu og gaf því sjálfstraust.

Verða á heimavelli

Norðmenn verða klárlega á heimavelli í þessum leik. Ákveðið var að spila riðilinn í Álaborg svo það væri stutt fyrir Norðmenn að komast á völlinn.

Þess utan spila markvörðurinn Ole Erevik og hornamaðurinn Håvard Tvedten með liði Álaborgar í dönsku deildinni. Aðalstjarna norska liðsins, Kristian Kjelling, spilaði með Álaborgarliðinu í fyrra þannig að stuðningur við Norðmenn verður vafalítið mikill í leiknum. Íslendingarnir sem mæta á völlinn verða því heldur betur að láta í sér heyra.

„Það er mikil hefð fyrir því hjá Norðmönnum að koma til Álaborgar, skemmta sér og njóta lífsins. Ég vona að þeir komi líka á völlinn til þess að styðja okkur. Vonandi getum við unnið einn leik í riðlinum og komist áfram,“ sagði Hedin en hann veit sem er að þetta er lykilleikur riðilsins fyrir bæði lið.

Það er góð blanda í norska liðinu. Reyndir menn í bland við unga og efnilega. Kristian Kjelling er maðurinn sem Norðmenn treysta á. Norðmenn eiga líka fínar örvhentar skyttur eins og Christoffer Rambo. Varnarleikur liðsins er öflugur og Erevik sterkur þar fyrir aftan. Bjarte Myrhol línumaður fer fyrir varnarleiknum og er ávallt hættulegur á línunni þess utan.

Verður besti leikmaður heims

Eins og áður segir eru margir ungir og spennandi leikmenn að koma upp hjá Norðmönnum. Nægir þar að nefna hinn 21 árs gamla Harald Reinkind og svo 18 ára undrið Sander Sagosen.

„Hann spilar eins og leikmaður sem hefur mun meiri reynslu en 18 ára strákur. Hann er frábær miðjumaður sem býr yfir meiri skotógnun en flestir miðjumenn,“ sagði Hedin en hann sparar ekki stóru orðin þegar kemur að þessum efnilega gutta.

„Hann á ekki bara eftir að verða besti handboltamaður Noregs. Hann á eftir að verða besti handboltamaður heims.“

Leikurinn hefst klukkan 15.00 og verður í beinni textalýsingu á Vísi.