Zubizarreta rekinn og Puyol hættir

Það er titringur í herbúðum Barcelona þessa dagana og markvarðargoðsögnin, Andoni Zubizarreta, hefur verið rekinn frá félaginu.

Zubizarreta tók við sem íþróttastjóri félagsins árið 2010 og framlengdi samning sinn við félagið á síðasta ári til ársins 2016.

Ekki bara var Zubizarreta rekinn því aðstoðarmaður hans, fyrrum varnarmaðurinn Carles Puyol, sagði í kjölfarið starfi sínu lausu.

Barcelona vann engan titil í fyrra og Zubi var gagnrýndur fyrir að hafa ekki náð að styrkja vörn liðsins nægilega vel.

Tapið gegn Real Sociedad og sú staðreynd að Barcelona má ekki kaupa leikmenn aftur fyrr en 2016 varð þess valdandi að stjórn félagsins ákvað að stokka spilin og losa sig við Zubizarreta.