Óttast fordæmið sem Blurred Lines-dómurinn mun hafa á bransann

Kviðdómur í Bandaríkjunum hefur komist að þeirri niðurstöðu að tónlistarmennirnir Robin Thicke, Pharrell Williams og rapparinn T.I. líktu eftir lagi Marvin Gaye, Got To Give it Up, þegar smellurinn Blurred Lines var saminn og velta margir fyrir sér hvaða afleiðingar þetta mun hafa á tónlistariðnaðinn.

Thicke og Pharrell hafa nefnilega haldið því fram að þeir hefðu verið að ná fram ákveðnum tíðaranda þegar þeir sömdu lagið Blurred Lines og þeir hafi ekki haft lag Gayes til hliðsjónar. Byggðist vörn þeirra aðallega á því að enginn geti átt rétt á tíðaranda eða stíl.

Lagið var eitt af lögum ársins 2013, þegar horft er til spilunar, en fljótlega eftir að það náði á topp vinsældalista fóru að heyrast þær raddir að lagið væri afar líkt lagi Marvins Gaye, Got To Give it Up, þá sérstaklega hljóðfæraleikurinn.

Í kjölfarið hótaði dánarbú Gayes, sem börn hans Frankie og Nona eru í forsvari fyrir, að stefna Robin Thicke á þeim grundvelli að Blurred Lines væri of líkt lagi föður þeirra.

Thicke, Pharrell og T.I. svöruðu þessum hótunum með því að stefna dánarbúi Gayes og sagði lögmaður Thickes á þeim tíma að tilgangurinn með Blurred Lines var að endurvekja tíðaranda og að fjölskylda Gayes gæti ekki slegið eignarhaldi á tegund tónlistar.

Ummæli Thickes sönnunargagn

Thicke hafði hins vegar sagt í viðtali við tímaritið GQ í maí árið 2013 að Got to Give It Up væri eitt af hans uppáhalds lögum og fjölskylda Gayes notaði þessi orð hans sem sönnun þess að hann hefði stolið lagi föður þeirra.

Í apríl árið 2014 hafði Thicke breytt framburði sínum og sagðist hafa verið undir áhrifum áfengis og verkjalyfja þegar hann hélt því fram að Got to Give It Up hefði haft mikil áhrif á hann og viðurkenndi einnig að hafa átt lítinn þátt í því að semja lagið. Sagðist hann hafa verið mjög svekktur yfir því að hafa ekki átt neina þátttöku í að semja stærsta smell ferils síns og grátbað því um viðurkenningu fyrir laginu.

Máttu ekki spila lögin samtímis

Fjölskylda Gayes hélt því fram að þremenningarnir hefðu stolið tónverki Marvins Gaye og því var rödd hans, trommutaktur og bakraddir ekki haft til hliðsjónar við réttarhöldin.

Því mátti kviðdómurinn einungis horfa til nótna lagsins og máttu lögmenn fjölskyldunnar ekki spila lögin samtímis til að sýna fram á líkindi þeirra. Þeir fengu hins vegar leyfi til að spila strípaða útgáfu af laginu fyrir kviðdóminn þar sem bornar voru saman bassalínur laganna tveggja.

Söng og spilaði á píanó fyrir kviðdóminn

Verjendur þremenninganna reyndu hvað þeir gátu að sannfæra kviðdóminn að líkindi geti verið á milli laga þó svo að þau séu ekki stolin. Robin Thicke bar meðal annars saman lögin With or Without You með U2, Let It Be með Bítlunum, Forever Young með Alphaville,  No Woman No Cry með Bob Marley og Man in the Mirror með Michael Jackson. Þetta gerði Thicke með því að syngja lögin fyrir kviðdóminn á meðan hann lék á píanó.

„Hefur sagt okkur að hann sé ekki heiðarlegur“

Lögmaður fjölskyldu Gayes sagði málið snúast um trúverðugleika Thickes. „Það sem hann hefur sagt er eftirfarandi: Já, við tókum það. Já, við lugum um það. Já, við breyttum sögu okkar ítrekað. Því snýst þetta um hverju þið trúið? Trúið þið Robin Thicke sem hefur sagt okkur að hann sé ekki heiðarlegur?,“ sagði lögmaður fjölskyldunnar við kviðdóminn.

Svo fór að lokum að kviðdómurinn dæmdi fjölskyldu Gayes 7,4 milljónir dali í bætur vegna höfundaréttarbrots. Pharrell, Thicke, T.I. og útgáfufyrirtæki þeirra höfðu þénað 16 milljónir dollara á Blurred Lines en dómurinn ákvað að fjölskylda Gayes ætti rétt á fjórum milljónum í skaðabætur og 3,4 milljónum af tekjum lagsins. Var Thicke dæmdur til að greiða fjölskyldunni 1,7 milljónir dollara og þarf Pharrell að greiða henni 1,6 milljónir dollara.

Hvað verður um blúsinn?

Verjendur þeirra segja þessa niðurstöðu kviðdómsins eiga eftir að hafa víðtæk áhrif á tónlistarbransann nú þegar fordæmi er komið fyrir því að menn séu dæmdir fyrir að stela tíðaranda eða stíl. Aðrir benda þó á að í raun muni framhaldið ráðast af tekjunum af lögunum. Því hærri tekjur því meira er upp úr því að hafa að sækja rétt sinn, líkt og í tilfelli Tom Pettys og Sam Smiths.

Því ef allt fer á versta veg líkt og verjendur Thickes og Pharrells halda fram þá gætu ansi margir blúsarar átt í hættu að fá á sig stefnu fyrir höfundarréttarbrot og þá er spurningin hver fann upp blúsinn.

Má muna sinn fífil fegurri

Það má segja að Blurred Lines hafi reynst ansi afdrifaríkt fyrir Robin Thicke. Hann varð að einum vinsælasta tónlistarmanni heimsins þegar það tröllreið útvarpsstöðvum sumarið 2013. En líkt og Thicke greindi sjálfur frá þá var hann ekki á góðum stað þegar hann var hvað vinsælastur. Hann var djúpt sokkinn í neyslu áfengis og verkjalyfja og var margsaga um hlut sinn í laginu.

Þá var texti lagsins afar umdeildur og þótti niðurlægjandi í garð kvenna og kom Thicke ekki vel úr þeirri umræðu. Í febrúar árið 2014 bárust þær fregnir að Thicke og eiginkona hans hefðu ákveðið að skilja.

Konan farin og óðurinn skotinn niður

Í september sama ár gaf Thicke út plötuna Paula sem var óður hans til fyrrverandi eiginkonu sinnar en platan var skotin niður af gagnrýnendum. „Paula Patton á betra skilið og einnig hlustendur,“ sagði einn um plötuna sem seldist ekki vel, miðað við þá velgengni sem Thicke hafði upplifað sumarið áður með Blurred Lines.

Platan seldist í 530 eintökum í Bretlandi en gekk ögn betur í Bandaríkjunum. Þar seldust 25 þúsund eintök af Paula en Blurred Lines seldist í 117 þúsund eintökum á sinni fyrstu viku.

Talið er að þessi niðurstaða kviðdómsins muni ekki hafa eins mikil áhrif á Pharrell sem er hvað þekktastur fyrir smellinn sinn Happy og hefur í áraraðir samið fjölda smella.