Heimir: Eiður er til í að fórna sér fyrir land og þjóð

Eiður Smári Guðjohnsen var valinn aftur í íslenska landsliðshópinn í dag og glöddust margir yfir því.

Eftir síðari umspilsleikinn um laust sæti á HM gegn Króötum sagði Eiður Smári að hann væri væntanlega búinn að spila sinn síðasta landsleik.

Eiður hefur aftur á móti gengið í endurnýjun lífdaga hjá Bolton þar sem hann er að spila mjög vel. Hann er líka sá framherji í hópnum sem er að spila mest, og best, þessa dagana.

„Eiður var mjög jákvæður á þetta verkefni þó svo konan hans eigi von á barni á svipuðum tíma og leikurinn fer fram. Það er virðingarvert af honum og sýnir hvernig týpa hann er. Hann er til í að fórna sér fyrir land og þjóð," segir Heimir Hallgrímsson, annar landsliðsþjálfara Íslands, en hann er glaður að fá Eið aftur inn í hópinn.

„Það þurfti ekkert að sannfæra hann í þetta verkefni. Hann var tilbúinn og veit hvernig staðan er hjá okkur. Við leituðum til hans og hann var til í slaginn."