Þór Hinriksson hættur hjá Val

Þór Hinriksson hefur látið af störfum sem þjálfari kvennaliðs Vals í fótbolta. Þetta kemur fram í fréttatilkynningu frá Val.

Þar kemur fram að Þór hafi hætt að eigin frumkvæði þar sem hann sé upptekin að sinna fyrirtæki sínu, Battar Knattspyrnuþjálfun.

Þór tók við Valsliðinu um mitt síðasta sumar af Helenu Ólafsdóttur og gerði í haust þriggja ára samning við félagið.

Honum var ætlað að stýra Val í sameiningu með Ólafi Brynjólfssyni, fyrrverandi þjálfara karlaliðs Gróttu. Ólafur mun nú stýra liðinu einn.