Bauð sjálfur í eigin disk: „Sennilega föngulegur safngripur“

„Þetta er platan SP sem við gáfum út árið 2001 rétt áður en rappbylgjan skall á af fullum þunga,“ segir Hlynur Ingólfsson en á árum áður var hann einn meðlima akureyrsku hljómsveitarinnar Skyttnanna. Fyrir skemmstu var eintak af disknum til sölu í hópnum Gamalt íslenskt hiphop og Hlynur bauð í sinn eigin disk.

„Mér finnst hálfkjánalegt að bjóða í eigin disk en mig langar að eiga þetta. Ég átti eintak en það hefur einhver rænt því eða það týnst í flutningum. Ég sé svolítið eftir því þar sem ég á ekki einu sinni stafrænar útgáfur af öllum lögunum þarna.“

Meðal laga á plötunni má nefna MC Sökker og Ég geri það sem ég vil en alls voru níu lög á henni. Plötuna er hvergi að finna á vefnum þó að einhver laga hennar megi finna á Youtube. Líkt og áður segir kom gripurinn út árið 2001 en þá voru meðlimir sveitarinnar flestir í kringum sextán ára gamlir.

„Við tókum allt upp sjálfir og skrifuðum sjálfir á geisladiska sem við höfðum keypt. Prentuðum umslagið út sjálfir og tússuðum á diskana. Maður þurfti að redda sér,“ segir Hlynur. „Alls held ég að það hafi verið gerð sjötíu eintök sem seldust ágætlega. Mig minnir að þær hafi verið seldar í SMASH eða Brim fyrir sunnan og selst upp eftir að Ég geri það sem ég vil byrjaði að fá spilun í útvarpi.“

„Ég bauð 2.999 krónur í gripinn sem er það sama og ég borgaði fyrir nýju Gísla Pálma plötuna. Því var hafnað enda platan sennilega föngulegur safngripur.“

Skytturnar hafa ekki komið saman í fullri mynd síðan árið 2010 er þær spiluðu í afmæli landsliðsfyrirliðans Arons Einars Gunnarssonar í Sjallanum. „Ef tilefnið er rétt er aldrei að vita annað en eitthvað gerist aftur. Ég hef rappið sem áhugamál fyrir mig og tek vers og vers með góðum vinum.“