NBA: 40 ára bið á enda hjá Golden State Warriors | Myndbönd

Það verða Golden State Warriors og Cleveland Cavaliers sem spila til úrslita um NBA-meistaratitilinn í ár en það var ljóst í nótt eftir að Golden State vann fimmta leikinn í einvígi sínu við Houston Rockets.

Golden State Warriors vann 104-90 heimasigur á Houston Rockets í nótt og einvígið þar með 4-1 en Golden State vann þrjá fyrstu leikina. Liðin tvö sem spila úrslita unnu þar með 8 af 9 leikjum sínum í úrslitum Austur- og Vesturdeildarinnar því Cleveland sló Atlanta Hawks út 4-0.

Stephen Curry skoraði 26 stig fyrir Golden State Warriors í leiknum í nótt og Harrison Barnes var með 24 stig. Curry var einnig með 8 fráköst, 6 stoðsendingar og 5 stolna bolta.

„Bay-svæðið er búið að bíða eftir þessu í 40 ár. Mér fannst alveg vera kominn tími á þetta," sagði Stephen Curry eftir leikinn en Golden State Warriors spilaði síðast til úrslita í NBA-deildinni árið 1975 þegar liðið vann Washington Bullets í úrslitunum.

Klay Thompson skoraði 20 stig í leiknum en hann fékk þungt höfuðhögg snemma í fjórða leikhlutanum og lá á gólfinu í um það bil mínútu. Hann kom aftur á bekkinn en þá var búið að sauma hann.

Þetta er í annað skiptið sem Svettu-bróðir fer af velli eftir högg en Stephen Curry datt mjög illa í leik fjögur. Stephen Curry kom til baka í þeim leik og spilaði vel í nótt. Framhaldið hjá Klay Thompson er ekki ljóst því hann fór að sýna merki um að hafa fengið heilahristing eftir leikinn.

Dwight Howard var með 18 stig og 16 fráköst fyrir Houston-liðið en stórstjarna liðsins, James Harden, skoraði bara 14 stig og var með 13 tapaða bolta og hitti aðeins úr 2 af 11 skotum sínum.

„Ég reyndi að gera aðeins of mikið, tapaði boltanum og gaf þeim færi á auðveldum körfum í hraðaupphlaupum. Við vildum ekki að tímabilið okkar endaði hér en þetta hefur verið mjög góð leiktíð. Við ætlum og verðum betri á næsta tímabili," sagði James Harden eftir leikinn.

Houston Rockets kom til baka eftir að hafa lent 3-1 undir á móti Los Angeles Clippers en leikmenn Golden State Warriors ætluðu ekki að láta þá framkalla annað kraftaverk.

Lokaúrslit Golden State Warriors og Cleveland Cavaliers hefjast 4. júní næstkomandi og bæði liðin fá því góðan tíma til að jafna sig eftir fyrstu þrjár umferðirnar í úrslitakeppninni.