Ásgeir Orri: Fáránlega mikil orka í loftinu

„Takk fyrir,“ kallaði María Ólafsdóttir til ákafra áhorfenda eftir síðustu æfingu sína á stóra sviðinu í Vín í dag fyrir dómararennslið sem fram fer í kvöld.

Dómnefndin hefur helmingsvægi á móti atkvæðum í símakosningu og því kvöldið í kvöld afar mikilvægt fyrir íslenska hópinn.

Stemningin var góð hjá íslenska hópnum sem segir andrúmsloftið rafmagnað.

Stress sé aðeins farið að gera vart við sig en tilhlökkunin gríðarleg.

„Það er svo mikil orka í loftinu að það er fáránlegt. Maður bara getur ekki verið kyrr,“ sagði Ásgeir Orri Ásgeirsson, einn lagahöfunda Unbroken, þegar Davíð Lúther Sigurðarson hjá Silent náði af honum tali fyrir æfinguna í dag.

Í meðfylgjandi myndskeiði má sjá þegar hópurinn kom í höllina fyrir æfinguna og undirbjó sig fyrir æfinguna. Friðrik Dór, Selma Björnsdóttir, strákarnir í StopWaitGo og allur hópurinn er greinilega mjög vel stemmdur.

„Við erum mjög ánægð með græna herbergið, við erum fyrir miðjum sal,“ segir Pálmi Ragnar Ásgeirsson lagahöfundur.

Í lok myndbandsins stígur María síðan á sviðið og syngur lagið af miklu öryggi.

Seinna undanúrslitakvöld Eurovision fer fram á morgun klukkan 19 og verður María tólfta á svið.

Þá ræðst það hvort Íslendingar haldi áfram í aðalkeppnina á laugardag.

Fyrra undanúrslitakvöldið fór fram í gær og komust þá tíu þjóðir áfram af sextán.

Hvaða Eurovision-lög eru best þetta árið? Taktu þátt í könnun Vísis hér.