Facebook færði konuna úr skugga karlsins

Tákn skipta máli. Sú einfalda staðreynd fékk Caitlin Winner, yfirhönnuð hjá Facebook til þess að breyta því hvernig tákn síðunnar endurspeglar konur.

Nokkur atriði trufluðu Winner þegar kom að skuggamyndinni sem sjá má hér til hliðar sem notuð hefur verið víðsvegar um Facebook.

Í fyrsta lagi voru axlir konunnar ekki samhverfar og hún var með skarð í öxlinni. Caitlin Winner skrifar ítarlega um breytingarnar í grein á síðunni Medium og þar notar hún orðatiltækið „to have a chip on one's shoulder“ eða „að vera með skarð í öxl“.

Á ensku merkir orðatiltækið að vera reiður yfir að vera beittur óréttlæti eða að líða eins og maður sé á einhvern hátt ekki jafnmikils virði og aðrir.

„Ég gerði ekki ráð fyrir að þetta hefði verið gert viljandi heldur vandamálið bara hugsunarleysi. En sem kona með tvær sterklegar axlir þá móðgaðist ég.

Og auk þess sem konan er alltaf fyrir aftan karlinn í táknmyndum hópa. Og svo ekki sé minnst á að hár konunnar leit út eins og hjálmur Svarthöfða.“

Eftir að Winner hafði kvartað við samstarfsmann um táknið var hún minnt á kennisetningu Facebook: „Ekkert hjá Facebook er vandamál einhvers annars.“

Því hóf hún að finna lausn á vandanum sjálf, teiknaði nýtt tákn fyrir konu, lagaði axlirnar og teiknaði upp nokkrar mismunandi hárgreiðslur.

En hún hætti ekki þar heldur ákvað að nútímavæða tákn karlmannsins líka og þróa þriggja persónu táknmynd sem gæti verið notuð þegar Facebook reyndi að vera hlutlaus þegar kom að kyni.

Myndin sem nísti hvað mest var þó hóp- og vinaatáknið sem staðsetti karlmanninn alltaf fyrir framan konuna, karlinn stærri og konan mun minni fyrir aftan. „Sem kona, menntuð við kvennaskóla, þá var erfitt fyrir mig að lesa ekki neitt í táknið, konan stóð fremur bókstaflega í skugga mannsins.“

Eftir að hún reyndi að láta skuggamyndirnar standa hlið við hlið með þeim afleiðingum að táknmyndin virtist vera af goðsagnakenndu tvíhöfða skrímsli ákvað hún að færa konuna fyrir framan karlinn.

Þessi tákn hafa nú orðið virk hjá mörgum notendum samfélagsmiðilsins.