Theodór fyrstur til að fjúka í Pepsi-deild kvenna

Theodóri Sveinjónssyni hefur verið sagt upp störfum sem þjálfara Aftureldingar í Pepsi-deild kvenna. Þetta kemur fram á Fótbolta.net.

Afturelding er í 10. og neðsta sæti Pepsi-deildarinnar með aðeins eitt stig eftir níu leiki. Dropinn sem fyllti mælinn virðist hafa verið 1-3 tap fyrir Íslandsmeisturum Stjörnunnar í gær.

Theodór tók við liði Aftureldingar af John Andrews fyrir tímabilið í fyrra. Mosfellingar enduðu í 8. sæti Pepsi-deildarinnar í fyrra og voru aðeins einu stigi frá því að falla.

Theodór er fyrsti þjálfarinn í Pepsi-deild kvenna í ár sem fær að taka pokann sinn.