Barcelona hættir við að kaupa Pogba

Josep Bartomeu, forseti Spánarmeistara Barcelona, segir að Katalóníufélagið sé hætt við að kaupa franska miðjumanninn Paul Pogba.

Börsungar hafa verið mjög áhugsamir um að landa Frakkanum í sumar og hefur það hingað til verið kosningaloforð bæði Bartomeu og Laporta, forsetaframbjóðenda.

Juventus hafnaði 80 milljóna evra tilboði Barcelona í leikmanninn í síðustu viku og ætla Spánarmeistararnir ekki að gera nýtt tilboð í hann að sögn forsetans.

„Við munum ekki kaupa Pogba í ár. Hann er ekki í okkar plönum fyrir næstu leiktíð,“ sagði Josep Bartomeu við fréttamenn í gær.

Dragi Barcelona sig úr baráttunni núna gæti liðið misst af því að fá þennan gríðarlega efnilega leikmann í sínar raðir.

Manchester City er nefnilega sagt í enskum miðlum vera að undirbúa stærsta kauptilboð sögunnar í leikmanninn. Þá er Chelsea sagt ætla bjóða 50 milljónir evra og Brasilíumanninn Oscar fyrir Pogba.