Turan keyptur til Barcelona

Barcelona hefur gengið frá kaupum á miðjumanninum Arda Turan frá Atletico Madrid fyrir tæpa fimm milljarða króna.

Turan er 28 ára Tyrki sem kom til Spánar frá Galatasaray árið 2011. Síðan þá hefur hann skorað 22 mörk og gefið 32 stoðsendingar fyrir Atletico Madrid.

Hann má þó ekki spila með Barcelona fyrr en eftir áramót þar sem Barcelona var sett í félagaskiptabann allt árið 2015 fyrir að brjóta reglur FIFA um félagaskipti leikmanna átján ára og yngri.

Málið er þess fyrir utan flókið vegna yfirvofandi forsetakosninga félagsins. Barcelona er nú stýrt af sérstakri nefnd sem þurfti að samþykkja kaupin. En nýr forseti félagsins, sem verður kjörinn þann 18. júlí, hefur heimild til að selja Turan aftur til Atletico með tíu prósenta afslætti innan tveggja sólarhringa.