Helmingi fleiri öryggisverðir í Ríó en í London

Brasilíumenn taka öryggismálin mjög alvarlega fyrir Ólympíuleikana næsta sumar.

Brasilíska Ólympíunefndin ætlar að ráða alls 85 þúsund öryggisverði en það eru helmingi fleiri verðir en störfuðu á leikunum í London árið 2012.

„Álíka viðburður hefur aldrei farið fram í þessu landi," sagði yfirmaður öryggismála, Andrei Augusto Rodrigues.

Brasilíumenn eru að glíma við mörg vandamál í aðdraganda leikana og þar á meðal í siglingakeppninni þar sem flóinn er uppfullur af skít og eiginlega ekki boðlegur.

Brassarnir eru enn vongóðir um að þeim takist að hreinsa upp flóann en tíminn vinnur ekki með þeim.