Verður Stern borgarstjóri í New York?

Það hefur farið lítið fyrir David Stern, fyrrum yfirmanni NBA-deildarinnar, síðan hann hætti í febrúar á síðasta ári.

Hann hefur látið sjá sig á einstaka leik sem og á NBA-viðburðum en þess utan hefur hann forðast sviðsljósið eins og hann getur.

Nú greina bandarískir fjölmiðlar frá því að svo gæti farið að hann muni sækjast eftir borgarstjóraembættinu í New York.

Vinir hans hafa í það minnsta hvatt hann til þess að fara í framboð en heimildarmenn segja að honum leiðist og vilji fara að gera eitthvað.

Stern er orðinn 73 ára gamall og segist ekki hafa áhuga á þessu embætti í dag hvað svo sem síðar verður.