Heimsfriður skrifaði undir eins árs samning hjá Lakers

Metta World Peace skrifaði í nótt undir eins árs samning hjá Los Angeles Lakers í NBA-deildinni og snýr hann því aftur til liðsins eftir tveggja ára heimsreisu.

Hinn 35 árs gamli World Peace hefur leikið með New York Knicks, Sichuan Blue Whales í kínversku deildinni og Pallacanestro Cantú í ítölsku deildinni frá því að hann var leystur undan samningi hjá Lakers sumarið 2013.

Samningurinn er til eins árs en honum er ætlað að aðstoða yngri leikmenn liðsins en hann hefur æft með Julius Randle sem Lakers völdu með 6. valrétt nýliðavalsins á síðasta ári í sumar.

Félagið getur sagt upp samningi hans hvenær sem er en félagið þarf að losna við fjóra leikmenn til þess að vera með 15 manna leikmannahóp líkt og reglur NBA-deildarinnar segja til um.

World Peace þykir skrautlegur karakter en hann breytti á sínum tíma nafni sínu úr Ron Artest í Metta World Peace en hann tók einnig upp kínverska nafnið The Panda's friend.

Þá var hann á sínum tíma settur í eins árs leikbann fyrir að hafa farið upp í stúku og ráðist á áhorfenda Detroit Pistons sem leikmaður Indiana Pacers.