Íslenskt köntrí slær í gegn á heimsvísu

„Við erum í rotation spilun á showi sem heitir The Iceman Show en þetta er DJ sem spilar bara ósamningsbunda Country Aritista. Hann er með show sem er endurspilað á 2500 affilitate stöðvum og heyrist í 139 löndum,“ segir forsprakki hljómsveitarinnar Axel Ó og co: Sjálfur Axel Ómarsson. Hann er fjallbrattur og má vera það. Hann segir fólk ekki gera sér nokkra grein fyrir hinni gígantísku dreifingu sem lagið er að fá.

Vísir fjallaði í sumar, með óbeinum hætti, um íslenska köntríhljómsveit sem þá var nýlega tekin til starfa. Blaðamaður fór á hestbak með Axeli og Magnúsi Kjartanssyni og þeir upplýstu hann þá um að þeir stefndu ótrauðir á hinn risavaxna Country & Western tónlistarmarkað. Jájá, meikdraumarnir eru ágætir fyrir sinn kúrekahatt en fæstir þeirra rætast. Þessi virðist hins vegar á góðri leið með að gera það.

Hinn íslenski Country Man flengist um heim allan

Lagið Country Man komst nú á föstudaginn í 1. sæti á Top 40 Countdown lista á útvarpsstöðinni Spectrum Radio Petts Wood (Suður London) með Micky Spectrum. Stöðin sérhæfir sig í sjálfstæðum eða óútgefnum tónlistarmönnum alls staðar að úr heiminum.  Stöðin starfar einnig náið með fremstu „Country“ stöðvum sem spila nýja „Independent“ Country tónlist.

Axel þylur upp nokkrar þeirra útvarpsstöðva sem eru með lagið hans Country Man í spilun víðsvegar um heim:

The Iceman show og A day to Nashville  í USA,  An Hour of Country  í Ástralíu,  www.RadioNashvilleInternational.com í Hollandi,  Norsk Country Radio og Countrykanalen í Svíþjóð svo einhverjir séu nefndir.

„Sömu artistar og eru fyrir neðan okkur á UK listanum eru á Top 10 listum í Texas! Ég er bara ekki búinn að senda lagið þangað,“ segir Axel. Og heldur áfram: „Það er gaman að segja frá því að við vorum allir í stúdíí í gær að taka upp næstu 4 lög með bandinu og vorum að hlusta á London Countdown þáttinn, þá hringi þáttarstjórnandinn i mig og tók viðtal við mig í tilefni að við vorum í fyrsta sæti.“

Valinn maður í hverju rúmi

Í hljómsveitinni Axel Ó og co er valinn maður í hverju rúmi, auk Axels sem syngur og spilar á kassagítar;  Magnús Kjartansson á píanó,  Sigurgeir Sigmundsson á gítara og pedal steel, Jóhann Ásmundsson á bassa og Sigfús Óttarsson á trommur.„Við erum að taka upp lög og vinna í sarpinn fyrir plötuna. Svo erum við að plana stórt Country Ball núna í Október.“

Hinar góðu viðtökur munu, ef af líkum lætur, opna ýmsar dyr, bæði þá hvað varðar útgáfu og tónleikahald en þetta er svo nýlega til komið að ótímabært er að segja til um hvert þessi velgengni leiðir. 

Hér má hlusta á lagið Country Man.