Sigmundur Davíð meðal fremstu karlfemínista heims

Sigmundur Davíð Gunnlaugsson, forsætisráðherra Íslands, er einn fremsti karlkynsfemínisti heims að mati Financial Times. Hann er þar í hópi manna á borð við Sir Richard Branson hjá Vigin, Vivek Wadhwa sem er höfundur „Innovating Women: the Changin Face of Technology og Anton Jenkins sem er fyrrum framkvæmdastjóri Barclays.

Financial Times birti um miðjan síðasta mánuð úttekt þar sem nefndar eru helst vonarstjörnur á annars skýjuðum himni jafnréttismálanna; karlkyns femínista. Úttektina er að finna í þeim hluta blaðsins sem er undir yfirskriftinni Konur í viðskiptum.

Jöfn laun kynja árið 2022

Þetta eru sem sagt engar smákanónur sem okkar maður er í hópi með, en yfirskriftin á greininni þar sem farið er í saumana á afrekum þeirra sem tilnefndir eru sem sannir femínistar er: „FT´s top feminist men help women succeed in business and beyond“.

Í klausu þar sem gerð er grein fyrir helstu afrekum Sigmundar Davíðs sem karlfemínista er sagt að hann hafi farið fyrir flokki í UN Women HeForShe-herferðinni og þá hyggist hann koma á jöfnum hlut kvenna og karla í stétt blaðamanna. Það eru fréttir hér á Fróni, því ekki er vitað hvernig hann ætlar að bera sig að við það, né heldur er vitað hvaða heimildir FT hefur fyrir þessu. Auk þess er sagt að hann ætli að laga að fullu launamun milli kynja 2022. Jöfn laun kynja árið 2022. Líkast til er þar vísað til þess sem hér segir.

Hættu að nota mig og kynsystur mínar!

Víst er að afrek Sigmundar Davíðs eru ekki óumdeild á þessu sviði, kannski fremur en öðrum og má ef til vill segja um forsætisráðherra vorn að þar sannist hið forkveðna að enginn sé spámaður í sínu föðurlandi. Þannig birtist harðskeytt grein í Kvennablaðinu nýverið, einmitt um svipað efni þar sem Hólmfríður Berentsdóttir hjúkrunarfræðingur beinlíns frábiður sér það að Sigmundur Davíð noti sig og kynsystur sínar sér til framdráttar. Hún vísar meðal annars til þess þegar lög voru sett á verkfall hjúkrunarfræðinga og segir meðal annars, og sparar sig hvergi:

„Sigmundur Davíð, hættu að nota mig og kynsystur mínar til að fróa þínu egói á alþjóðavettvangi og farðu að laga til heima hjá þér. Þetta fólk, sem þú þykist vera að stæra þig við, hefur internet og getur fylgst með afglöpum þínum úr fjarlægð,“ skrifar Hólmfríður en ólíklegt er að rödd hennar nái eyrum þeirra á Financial Times.

Þeir hinir tilnefndu

Til nánari glöggvunar á því mannvali sem Sigmundur Davíð tilheyrir þá eru eftirfarandi sem sagt tíu verðugir sem FT tilnefnir sérstaklega og gefst svo áskrifendum kostur á að kjósa á milli þeirra sem „our champions of women“.

Sir Win Bischoff — member 30% Club

Sir Richard Branson — Virgin Group founder

Sigmundur Davíð Gunnlaugsson — prime minister, Iceland

Matt Groening — creator of The Simpsons

Antony Jenkins — Barclays’ former chief executive

Joe Keefe — chief executive, Pax World Funds

Josh Levs — CNN journalist

Jean-Pascal Tricoire — Schneider Electric chief executive

James Turley — former EY chief executive

Vivek Wadhwa — tech sector critic