Rose missir líklega af byrjun tímabilsins

Meiðslapésinn Derrick Rose, leikmaður Chicago Bulls, er enn og aftur kominn á meiðslalistann og fór í raun þangað fyrir tveim vikum síðan.

Hann mun líklega missa af því sem eftir er af undirbúningstímabilinu sem og byrjun leiktíðarinnar eftir að hafa brotið bein í andlitinu.

Rose ætlaði að byrja að æfa aftur í dag en ekkert verður af því þar sem hann er ekki búinn að jafna sig. Það eru enn miklar bólgur í andlitinu eftir aðgerðina sem hann þurfti að gangast undir.

Sem fyrr vill félagið fara varlega með hann enda langtímahagsmunir félagsins í húfi.

Fyrsti leikur Bulls í deildinni fer fram þann 27. október.