Yfirráðasvæði ISIS hefur stækkað

Vígamenn Íslamska ríkisins hafa tekið síðustu flutningaleið hersins að borginni Aleppo í Sýrlandi. Borgin, sem er að hluta til í haldi hersins, var sú stærsta í Sýrlandi áður en borgarastyrjöldin hófst þar fyrir fjórum og hálfu ári.

Hermenn í borginni gætu því orðið skotfæralausir komist birgðaflutningar ekki til þeirra.

Undanfarnar vikur hefur herinn reynt að reka uppreisnarmenn og vígahópa frá Aleppo, en sú aðgerð er nú í hættu. Um helgina réðst bandalag andstæðinga Assad, sem leitt er af al-Nusra Front, armi al-Qaeda í Sýrlandi, gegn flutningaleiðum hersins til Aleppo úr vestri og ISIS réðst á veginn úr austri. Vígamönnum ISIS tókst að leggja stóran hluta leiðarinnar undir sig.

Eins og áður gerðu ISIS sjálfsmorðsárásir á stöður hersins og fylgdu þeim eftir með árás vígamanna. Þessari aðferð hafa samtökin beitt margsinnis bæði í Sýrlandi og í Írak.

Bæði andstæðingar Assad og ISIS hafa þrengt að flutningaleið stjórnarhersins til borgarinnar Aleppo. Síðan þetta kort var birt um helgina hefur staðan versnað fyrir herinn.

#Syria #Map Strategic Hama - Aleppo loyalist supply road cut by simultaneous attacks from Rebels and IS pic.twitter.com/84qXV4emql

— IUCA (@IUCAnalysts) October 23, 2015

Það að báðir hópar hafi gert árásir á svipuðum tíma, sem eru með sama markmið hefur vakið upp spurningar meðal sérfræðinga um hvort að þeir séu farnir að starfa saman að einhverju leyti.

Fyrr í mánuðinum réðust vígamenn ISIS gegn uppreisnarhópum norður Af Aleppo og tóku þeir þar nokkur þorp.

Sjá einnig: ISIS gerir skyndisókn í norðurhluta Sýrlands.

Sókn sýrlenska hersins hefur ekki gengið eins og skyldi, en herinn er studdur af hermönnum frá Íran, vígamönnum frá Hezbolla samtökunum í Líbanon og loftárásum Rússa. Í raun er um að ræða margar smærri aðgerðir en að hluta til hafa þær ekki gengið eins vel og ætla mætti vegna fjölgunar vopna sem ætlað er að granda skriðdrekum.

Nánar um sóknina gegn flutningaleiðunum.

PT: As of right now the regime supply line is threaten on 3 areas and cut at least on one #Syria pic.twitter.com/YMsfM3J14g

— Michael Horowitz (@michaelh992) October 27, 2015

Bandaríkin og bandamenn þeirra hafa sent töluvert meira af slíkum vopnum, svokölluðum TOW launchers, sem skjóta eldflaugum, til Sýrlands síðan Rússar hófu aðgerðir sínar þar.

Þá segja sérfræðingar sem Telegraph ræddi við að aukin geta stjórnarhersins hafi þvingað svokallað hófsama uppreisnarmenn til að leita hjálpar hjá vígahópum íslamista. Þeir hópar hafa lengi notið betri velgengni á vígvöllum Sýrlands. Þar á meðal vegna betri fjármögnunar en uppreisnarhóparnir búa yfir.

Þá hafa uppreisnarhóparnir fengið áðurnefnd TOW vopn frá Bandaríkjunum og meðlimir þeirra verið þjálfaðir í notkun þeirra. Íslamistar taka stuðningi þeirra fagnandi.

Rússar hafa ávalt haldið því fram að loftárásir þeirra beinist gegn ISIS, en sérfræðingar og vestræn yfirvöld segja svo ekki vera. Þeir segja að loftárásir þeirra hafi beinst gegn áðurnefndum uppreisnarhópum.

Það hefur leitt til þess að ISIS hefur getað fært vígamenn af víglínum þeirra við uppreisnarmennina, sem eru svo notaðir í bardögum gegn stjórnarhernum. Þannig hefur ISIS getað beitt meiri krafti gegn Assad og fylgismönnum hans.