„Þú verður bara að segja að ég hafi sagt þér að gera þetta“

Magnús Pálmi Örnólfsson, fyrrverandi starfsmaður Glitnis, var fyrsta vitnið sem saksóknari í Stím-málinu kallaði fyrir dóminn í dag.  Magnús er lykilvitni í málinu en hann breytti framburði sínum í yfirheyrslum hjá sérstökum saksóknara og veitti embættinu upplýsingar gegn því að hann nyti friðhelgi frá saksókn í málinu.  

Var á það fallist af hálfu ríkissaksóknara og nýtur Magnús því réttarverndar í málinu en hann hafði upphaflega stöðu sakbornings. Er þetta gert á grundvelli 5. greinar laga um embætti sérstaks saksóknara.

Magnús bar vitni í dag gegn fyrrverandi yfirmanni sínum, Jóhannesi Baldurssyni, sem var framkvæmdastjóri markaðsviðskipta Glitnis. Hann er ákærður fyrir umboðssvik vegna skuldabréfs sem einn fagfjárfestasjóða Glitnis, GLB FX, keypti af Sögu Capital í ágúst 2008. 

Segir að um óvenjuleg viðskipti hafi verið að ræða

Útgefandi skuldabréfsins var Stím en bréfið var upphaflega lánssamningur milli Sögu og Stím en fjárfestingabankinn lánaði félaginu einn milljarð vegna hlutabréfakaupa í nóvember 2007. 

Vill ákæruvaldið meina að með kaupunum á skuldabréfinu hafi Jóhannes stofnað fé GLB FX í hættu þar sem hann mátti vita að eigið fé Stím var neikvætt auk þess sem eignir félagsins höfðu rýrnað.

Magnús sá meðal annars um fjárfestingar fyrir GLB FX en sjóðurinn var aðallega í gjaldeyrisviðskiptum. Hann sagði því að kaupin á skuldabréfinu hefðu verið óvenjuleg og þess vegna myndi hann vel eftir þeim og hvernig þau komu til í ágúst 2008.

„Þetta byrjar þannig að ég fæ símtal frá Jóhannesi Baldurssyni vegna skuldabréfs sem við áttum að kaupa af Sögu Capital. Það kom strax fram að þetta væri díll og að þetta væri eitthvað loforð sem væri búið að gefa Sögu Capital,“ sagði Magnús í dag. 

„Ég svona humma þetta fram af mér“

Hann kvaðst ekki hafa gefið mikið út á þetta og sagðist ætla að skoða þetta þegar hann kæmi aftur til vinnu en hann var í fríi úti á landi. Þegar hann kom svo til baka sagði hann að honum hefði ekkert litist á þennan díl. Aðspurður hvers vegna svaraði Magnús:

„Því hugmyndin var að kaupa þetta bréf á alltof háu verði að mínu mati. [...] Ég sagði bara að þetta kæmi ekki til greina og svo líða dagarnir og ég svona humma þetta fram af mér.“

Magnús og Jóhannes áttu síðan fund þar sem þeir tókust á að sögn þess fyrrnefnda. Það hafi verið óvanalegt en honum hafi einfaldlega þótt þessi kaup „langt yfir strikið.“ Á endanum fór það þó svo að skuldabréfið var keypt.

„Ég bara segi við hann, þetta er það augljóst að þetta er langt yfir strikið. Ég spyr hann hvað ég eigi að gera þegar ég sit hér og þarf að svara fyrir þetta. Þá segir hann „Þú verður bara að segja að ég hafi sagt þér að gera þetta.“ [...]  Þetta var mjög óvenjulegt af hans hálfu að vera með einhverjar beinar skipanir.“

„One for the team“

Magnús sagði það ekki óeðlilegt að Jóhannes hafi komið með tillögu að díl á þessum tíma. Það sem hafi verið óeðlilegt í þessu tilviki var að þetta var díll „sem átti að gera.“

„Ef allt hefði verið eðlilegt og Jóhannes hefði verið með upplýsingar um einhvern samning þá værum við kannski að setjast niður til að meta raunverulegt virði dílsins.“

Að sögn Magnúsar lagði Jóhannes mikla áherslu á að það væri hrikalega mikilvægt fyrir bankann að klára þetta. Magnús þyrfti bara að taka „one for the team, taka þetta á kassann.“ Þá sagði Magnús að af hans hálfu hefðu ekki verið neinar viðskiptalegar forsendur fyrir því að kaupa skuldabréfið á þessum tíma.