Kobe gerir heimildarmynd um sjálfan sig

Kobe Bryant hefur ekki viljað staðfesta að þetta tímabil verði hans síðasta í NBA-deildinni.

Ansi margir trúa því en aðrir ekki. Þeirra á meðal fyrrverandi þjálfari hans, Phil Jackson. Eina sem Kobe segir er að hann muni ákveða í lok tímabils hvort hann vilji halda áfram.

Eitt er þó ljóst að ef þetta er kveðjutímabilið hans þá verður gerð mynd um það. Kobe er nefnilega búinn að ráða tökumenn til þess að fylgja sér í allan vetur.

Í kjölfarið hefur sú saga farið á kreik að hann sé búinn að ákveða að hætta en sé að geyma alla dramatíkina og yfirlýsingarnar fyrir myndina sína.

Hann vilji fara úr deildinni á sinn hátt og með sínum eigin orðum og gjörðum.