Spánverjar styttu jólafríið til að gefa landsliðinu meiri tíma fyrir EM

Það er óvenjustutt jólafrí í spænska fótboltanum að þessu sinni en Englendingar spila bara einum leik fleira en Spánverjar yfir hátíðirnar.

Spánverjar spiluðu ekki á öðrum degi jóla eins og Englendingar en spila bæði í þessari viku sem og um næstu helgi eins og enska úrvalsdeildin gerir líka.

Margir erlendir knattspyrnustjórar hafa kallað eftir jólafríi í ensku deildinni nú síðast Jürgen Klopp, knattspyrnustjóri Liverpool. Það kemur því flatt upp á suma að sjá Spánverja auka leikjaálagið yfir jól og áramót.

Spænska deildin er vanalega í fríi frá síðasta sunnudegi fyrir jól til Þrettándans, 6. janúar. Nú er hinsvegar spilað 29. og 30. desember sem og 2. og 3. janúar.

Aðalástæðan fyrir þessari breytingu í ár er Evrópumótið í Frakklandi en einnig þátttaka Barcelona í heimsmeistarakeppni félagsliða. Barcelona lék þar tvo leiki skömmu fyrir jól og tryggði sér fimmta titilinn á árinu 2015.

Lokaumferðin átti fyrst að vera 22. maí en EM hefst 10. júní. Vicente del Bosque, landsliðsþjálfari Spánverja, fékk það í gegn að færa lokaumferðina fram til 15. maí. Við því var orðið en þetta er ekki varanleg breyting.

Spánverjar eru í riðli með Tékkum, Tyrkjum og Króötum á EM í Frakklandi og spila fyrsta leikinn á móti Tékkum í Toulouse 13. júní.

Stöð 2 Sport sýnir tvo leiki á miðvikudaginn, Real Madrid og Real Sociedad mætast fyrst klukkan 15.00 og klukkan 19.30 mætast síðan Barcelona og Real Betis.