Rokka í stað þess að golfa

Þeir eiga samtals fjórtán börn, einn meðlimurinn barnabarn og er annað á leiðinni. Þeir kalla sig Trúboðana, spila rokk og vilja berjast gegn stöðnun í lífi sínu.

„Þegar ég komst á ákveðinn aldur leið mér eins og væri verið að slökkva á mér,“ segir Heiðar Ingi Svansson, sem fékk hugmyndina að því að stofna rokksveit, þrátt fyrir að vera eldri en flestir aðrir rokkarar. Hann fékk þá Guðmund Jónsson, gítarleikara úr Sálinni hans Jóns míns, söngvarann þjóðþekkta Karl Örvarsson og trommarann Magnús Magnússon til þess að leika rokk einu sinni í viku.

„Upphaflega hugmyndin var bara að koma saman og spila smá rokk og ról. Ég sannfærði félaga mína um að þetta væri sniðugri leið til þess að eyða tímanum en að stunda golf, fara í Oddfellow eða ganga í Frímúrararegluna. Nafnið kemur svo þannig til að fyrir okkur er þessi spilamennska ekki val heldur innri þörf sem stundum af jafnmikilli ástríðu og trúboðar sem boða trú sína. Meðlimirnir eiga samtals fjórtán börn og á Heiðar sjálfur eitt barnabarn. „Og annað rétt ókomið,“ bætir hann við.

Sveitin sendir nú frá sér sína fyrstu breiðskífu.

„Þetta er afrakstur samstarfs okkar. Við ætluðum okkur ekki að gefa út efni í upphafi, en þeir sem heyrðu lögin okkar hvöttu okkur til að gefa þetta út. Leyfa fleirum en þeim sem vinna kvöldvaktir á bifreiðaverkstæðinu við hliðina á æfingahúsnæðinu okkar að heyra lögin.“

Á plötunni, sem ber titilinn Óskalög sjúklinga, má heyra tíu frumsamin lög. Rokkararnir gefa plötuna út sjálfir og geta áhugasamir fundið þá í gegnum vefsíðuna Karolina Fund og keypt plötuna þar. „Við köllum þetta fyrirkomulag „beint frá bandi“,“ útskýrir Heiðar og vísar þar í hugtakið beint frá býli, þegar fólk kaupir ferskar vörur frá bændum.