Hárið stelur senunni

Kit Harington, ein aðalstjarna þáttanna The Game of Thrones sem hafa farið sannkallaða sigurför um heiminn, segist orðinn langþreyttur á tíðum spurningum sem snúa að hárinu á honum.

Harington skartar afar fallegu, þykku og voldugu svörtu hári sem margur öfundar hann af.

Segist kauði hafa fengið nóg af þeirri athygli sem hárið á honum fær, sem og útlit hans yfirhöfuð. Var það þáttarstjórnandinn Nick Grimshaw, á BBC, sem fékk leikarann til að opna sig svona á dögunum.

Harington lét dæluna ganga og sagðist finna mikið fyrir að athyglin færi óþarflega oft á hve glæsilegur hann væri í stað leiklistarhæfileika hans.

„Ekki misskilja mig,“ sagði hann, „mér þykir dásamlegt að fá að heyra hve fallegur ég er. En þetta getur truflað mann. Mér finnst ég ekki alveg svona fallegur.“