Þrjár kynslóðir spila saman á sólóplötunni

„Það er mjög gaman að fá þetta frábæra fólk til að syngja og spila saman inn á plötuna. Þetta er líka allt vinafólk mitt,“ segir tónlistarmaðurinn Karl Tómasson, betur þekktur sem Kalli Tomm, sem er um þessar mundir á fullu við að taka upp sína fyrstu sólóplötu.

Í einu lagi á plötunni spila og syngja saman þrjár kynslóðir úr sömu Hólm-fjölskyldunni, Ólafur Hólm Einarsson, sem er best þekktur fyrir að vera trommuleikari í hljómsveitum á borð við Nýdönsk og Todmobile, Einar Hólm Ólafsson, sem er faðir Ólafs, Hólm og Íris Hólm, systurdóttir Ólafs Hólm.

„Ég talaði fyrst við Einar og hann tók vel í erindið að syngja með mér. Þá athugaði ég Óla Hólm og hann var til og þá talaði ég við Írisi Hólm. Þetta var voðalega gaman og gekk alveg frábærlega,“ bætir Kalli Tomm við.

Ólafur Hólm er einn helsti trommuleikari þjóðarinnar og hefur eins og fyrr segir komið víða við, faðir hans Einar Hólm var meðal annars trommuleikari í Hljómsveit Magnúsar Ingimarssonar og þá hefur Íris Hólm einnig komið víða við og var til að mynda söngkona hljómsveitarinnar Bermúda.

Kalli Tomm er líklega best þekktur fyrir að hafa verið trommuleikari hljómsveitarinnar Gildrunnar í um þrjátíu ár. „Um leið og Gildran hætti óvænt var svolítið erfitt um stundarsakir að sætta sig við þau endalok. Maður var mikið að spá og spekúlera og fór svo loks að búa til lög, semja og syngja, nú er þessi draumur að verða að veruleika,“ segir Kalli Tomm. Hann var þó oft meðlagahöfundur í Gildrunni en þetta er í fyrsta sinn sem hann semur lög alveg einn.

„Þetta er búið að vera ægilega gaman. Stundum ganga hlutirnir betur en maður trúir.“

Hann nýtur liðsinnis frábærra listamanna á plötunni, auk áðurgreindra Hólmara. „Ég fékk æskuvin minn úr Gildrunni, hann Þórhall Árnason, og Þórð Högnason til að sjá um bassaleikinn. Gummi Jóns úr Sálinni og Tryggvi Hübner skipta með sér gítarleiknum. Ég sjálfur, Óli Hólm og Ásmundur Jóhannsson, sem er líka upptökustjóri, spilum á trommur, hljómborðsleikur er í höndum Ásgríms Angantýssonar, Jóns Ólafssonar og Júlíusar Óttars Björgvinssonar. Svo syngur Jóhann Helgason með mér á plötunni og á einnig tvö lög á henni,“ útskýrir Kalli Tomm.

Rithöfundarnir Bjarki Bjarnason og Vigdís Grímsdóttir skipta með sér textunum á plötunni. 

Hann segir plötuna heldur lágstemmda en að hún sé eiginlega tvískipt. „Hún skiptist í tvo helminga, annar hlutinn er akústískur, eða órafmagnaður, og í hinum hlutanum er meira af rafmagnstengdum hljóðfærum.“