Áhorfandinn býr til sögurnar sjálfur

„Þetta eru sögur sem áhorfandinn býr til sjálfur,“ segir Margeir Dire, sem opnaði sýninguna Milljón sögur í Gallery Orange í gær.



Þar eru til dæmis gluggaverk sem sjást utan frá, unnin með kalkspreyi. Önnur eru innandyra og snúa að salnum.



„Ég sæki myndefnið í eðli náttúrunnar, götulist, fólk og sögur. Mest er tengingin í götulistina,“ segir Margeir sem er þekktur fyrir að gefa sumum listaverkum sínum takmarkaðan líftíma.

„Ég hef stundum málað yfir verkin eða kveikt í þeim,“ segir hann og nefnir að kalkið í gluggunum á Galleríi Orange sé dæmi um slíkt.

„Kalkið verður þrifið af þegar sýningunni lýkur og glugginn fer í sitt gamla form. Fegurðin felst í því að fólk veit aldrei hvort verkið verður enn til á morgun svo það þarf að stoppa og njóta þess til fulls. Núna.“

Sýningin í Gallery Orange stendur þó í sex vikur.