Porsche áætlar minnkandi hagnað vegna rafbílaþróunar

Þýski sportbílaframleiðandinn Porsche hefur hagnast gríðarlega mikið á undanförnum árum enda gengið eindæma vel að selja magnaða bíla sína. Forsvarsmenn Porsche áætla að sá hagnaður muni minnka vegna mikilla fjárútláta við þróun nýjustu bílgerða sinna, sér í lagi rafmagnsbíla.

Porsche ætlar að fjárfesta fyrir einn milljarð evra vegna nýs Mission E rafmagnsbíls, ráða 1.000 nýja starfsmenn og byggja nýja verksmiðju þar sem bíllinn verður smíðaður.

Porsche hefur undanfarið skilað næst mestum hagnaði allra undirfyrirtækja Volkswagen samsteypunnar og fyrirtækið seldi í fyrsta skipti yfir 200.000 bíla á einu ári í fyrra. Porsche mun greina frá niðurstöðum síðasta árs þann 11. mars en árið áður hagnaðist Porsche um 2,72 milljarða evra og vafalaust verður hagnaður síðasta árs hærri en það.

Porsche fór ekki varhluta af dísilvélasvindli Volkswagen og þarf að innkalla 13.000 Porsche Cayenne bíla með dísilvélum og eitthvað mun sú innköllum kosta Porsche. Viðgerðirnar sjálfar verða þó ekki mjög kostnaðarsamar þó svo þær snúi bæði af vélbúnaðar- og hugbúnaðarbreytingum.