Curry með galdrabrögð gegn töframönnunum | Myndbönd

Stephen Curry svaraði fyrir einn versta leik sinn á tímabilinu í New York á sunnudaginn með rosalegri frammistöðu í 134-121 sigri NBA-meistara Golden State á móti Washington Wizards á útivelli í nótt.

Curry, sem skoraði „aðeins“ þrettán stig á móti New York á dögunum, var óstöðvandi í nótt og skoraði 51 stig, þar af 36 í fyrri hálfleik. Hann hitti úr þrettán af fjórtán skotum sínum í fyrri hálfleik og setti í heildina niður ellefu þriggja stiga skot.

Þessi magnaði leikstjórnandi virkaði svo aftur mannlegur í fjórða leikhlutanum þegar hann klúðraði sjö af tíu skotum sínum, en hann var þá löngu búinn að vinna leikinn fyrir meistarana. Golden State er nú búið að vinna 45 leiki og tapa aðeins 4 sem jafnar árangur Philadelphia 76ers frá 1967.

Curry fer hamförum:

Klay Thompson bætti 24 stigum í sarpinn fyrir Golden State en John Wall var í miklum ham fyrir heimamenn og skoraði 41 stig og gaf tíu stoðsendingar. Það var bara langt frá því að vera nóg. Draymond Green, miðherji Golden State, var að sjálfsögðu með þrennu, en hann skoraði tólf stig, tók tíu fráköst og gaf tólf stoðsendingar.

Án síns helsta stigaskorara vann Charlotte Hornets svo flottan heimasigur á LeBron James og félögum í Cleveland Cavaliers, 106-97. Jeremy Lin átti stjörnuleik í fjarveru Kemba Walker fyrir Charlotte og skoraði 24 stig.

Kyrie Irving var stigahæstur gestanna frá Cleveland með 25 stig en LeBron James skoraði 23 stig, tók sex fráköst og gaf sex stoðsendingar. Cleveland er eftir sem áður í efsta sæti austursins með 35 sigurleiki og þrettán tapleiki. Það hefur tveggja og hálfs leikja forskot á Toronto.

Curry og Wall skoruðu samtals 92 stig:

Mikil spenna var í Oklahoma City í nótt þar sem heimamenn í Thunder fóru í lokasóknina í stöðunni 114-114. Billy Donovan, þjálfari OKC, ákvað að taka ekki leikhlé heldur treysta Kevin Durant fyrir að taka síðasta skotið og hann brást ekki trausti þjálfara síns.

Durant setti niður þriggja stiga skot þegar hálf sekúnda var eftir og tryggði sínum mönnum þriggja stiga sigur, 117-114. Þetta er tólfti sigur OKC í síðustu þrettán leikjum.

Durant var lang stigahæstur heimamanna með 37 stig, en Russell Westbrook, leikstjórnandi Thunder-liðsins, heldur áfram að spila eins og andsetinn maður. Hann hlóð í glæsilega þrennu með 24 stigum, 19 fráköstum og fjórtán stoðsendingum, en þetta er áttunda þrennan hans á tímabilinu og sú þriðja í röð.

Úrslit næturinnar:

Charlotte Hornets - Cleveland Cavaliers 106-97

Philadelphia 76ers - Atlanta Hawks 86-124

Boston Celtics - Detroit Pistons 102-95

Brooklyn Nets - Indiana Pacers 100-114

Washington Wizards - Golden State Warriors 121-134

OKC Thunder - Orlando Magic 117-114

Dallas Mavericks - Miami Heat 90-93

San Antonio Spurs - New Orleans Pelicans 110-97

Utah Jazz - Denver Nuggets 85-81

Sacramento Kings - Chicago Bulls 102-107

LA Clippers - Minnesota Timberwolves 102-108

Staðan í deildinni.