Sinfóníuhljómsveit Íslands heldur stórtónleika í Hörpu

Sinfóníuhljómsveit Íslands flytur tvö verk í kvöld, annars vegar Píanókonsert Tsjajkovskíjs og hins vegar Leníngrad-sinfóníu Shostakovítsj.

Píanókonsert Tsjajkovskíjs er eitt vinsælasta tónverk allra tíma og í því gefst einleikaranum Kirill Gerstein færi á að sýna allar sínar bestu hliðar jafnt í tjáningu sem tæknilegri færni.

Gerstein er einn áhugaverðasti píanisti sinnar kynslóðar og er íslenskum áheyrendum að góðu kunnur og víst er að kraftur hans og innsæi hentar vel þessari spennandi efnisskrá. Fáir vita þó að Tsjajkovskíj endurskoðaði verkið eftir frumflutninginn og breytti ýmsu. Fyrir skömmu kom í leitirnar handritið að upprunalegu gerðinni frá 1875 og nú hljómar þessi útgáfa verksins í fyrsta sinn á Íslandi. 

Leníngrad-sinfónía Shostakovítsj er sérlega áhrifamikil tónsmíð. Hún var samin undir nærri ólýsanlegum kringumstæðum og lýsir innrás Þjóðverja í Sovétríkin í júní 1941. Umsátur þeirra um Leníngrad varði í níu hundruð daga og talið er að um milljón manns,  þriðjungur borgarbúa, hafi látið lífið í sprengjuárásum eða úr kulda, smitsjúkdómum og hungri. Sinfónían er magnþrunginn minnisvarði um reisn mannsandans og mátt listarinnar jafnvel þegar öll sund virðast lokuð.

Þótt Leníngrad-sinfónían sé ein sú merkasta sem Shostakovitsj samdi hefur hún aðeins tvisvar sinnum áður hljómað á tónleikum hér á landi í flutningi Sinfóníunnar. Fyrst undir stjórn Rumons Gamba árið 2005 og síðra undir stjórn Gennadíjs Rozhdestvenskíj á Listahátíð í Reykjavík 2009.

Uppselt er á tónleikana en þeir eru sendir út í beinni útsendingu á Rás 1.