Vildi ekki gefa mömmu klístraða fimmu

Sólveig Lára Kjærnested, fyrirliði Stjörnunnar, segir að það hafi ríkt mikil gleði með bikartitil helgarinnar en Stjarnan varð meistari eftir sigur á Gróttu í úrslitaleiknum á laugardag.

Sjá einnig: Sjöundi bikartitill Stjörnunnar

Stjarnan hefur á síðustu árum tapað þremur einvígum um Íslandsmeistaratitil auk bikarúrslitaleiks og segir hún að biðin hafi verið erfið eftir.

„Það hafði liðið langur tími frá síðasta titli. Við höfum alltaf verið með í baráttunni en aldrei tekist að taka skrefið til fulls,“ sagði hún í samtali við Vísi í gær. Blaðamaður fékk að trufla hana á meðan fjölskyldan hélt afmæli fyrir sex ára dóttur hennar, daginn eftir bikarsigurinn.

Sólveig Lára hefur upplifað ýmislegt á þeim fjórtán árum sem hún hefur verið í Stjörnunni. Hún tók þátt í miklu gullaldarskeiði liðsins á fyrsta áratug aldarinnar og mikilli niðursveiflu sem náði hámarki í ágúst 2011 þegar draga átti liðið úr keppni í efstu deild kvenna.

Það var þá hætt við þær aðgerðir en aðeins eftir að stjórn handknattleiksdeildar félagsins sagði af sér og aðalstjórn greip í taumana.

Sjá einnig: Stjarnan verður með þrátt fyrir allt

Sjá einnig: Sigurður: Gerðu lítið úr starfi Stjörnunnar

Allt bæjarfélagið reis upp

Sólveig Lára segir að það hafi verið erfitt á þessum árum. „Við vorum varla með mannskap og þetta stóð ansi tæpt. En sem betur fer hætti liðið ekki,“ rifjar hún upp.

„Þau sem voru að starfa við þetta þá gáfust upp. Þá reis allt bæjarfélagið upp og þau vildu ekki að svona sigursælt lið myndi detta út. Allur bærinn var samtaka í því að rífa starfið upp á ný.“

Hún segir að framtíðin sé björt í Stjörnunni, þó svo að meistaraflokkur kvenna í dag sé ekki endilega skipað eingöngu ungum leikmönnum. „Við eigum góða unglingaflokka og sterka þjálfara. Það hefur verið gott starf unnið og það er að skila sér í því að við erum að fá góða leikmenn upp í meistaraflokk.“

Getum gert góða hluti í vor

Stjarnan er sem stendur í sjötta sæti Olísdeildarinnar, sjö stigum á eftir toppliði Gróttu. Það er þó þéttur pakki á toppi deildarinnar og sigur Stjörnunnar um helgina sýnir að úrslitakeppnin verður galopin.

„Sigurinn í bikarnum mun gefa okkur mikið og ég hef trú á því að við getum gert ansi góða hluti í vor. Þetta verður erfitt en við erum alls ekki saddar. Það var ofsalega sárt að tapa [í úrslitunum] gegn Gróttu í fyrra fyrir okkur sem tóku þátt í þeim leikjum og það var því sérstaklega gott að vinna Gróttu í úrslitunum núna.“

Sólveig Lára veit ekki hvað hún hefur unnið marga titla á ferlinum en getur þó staðfest að þetta var hennar þriðji bikarmeistaratitill. Og hún segir að þessi hafi verið sérstaklega sætur.

„Það er heilmikill pakki að vera í þessu á fullu þegar maður er líka með fjölskyldu. Það eru svo margir sem standa á bak við mann og það er gaman að geta glatt þá með því að vinna titil,“ segir hún en yngri dóttir hennar, þriggja ára, var eitthvað treg til að gefa mömmu sinni „sigurfimmu“ eins og sést á myndinni efst í fréttinni.

„Hún var eitthvað pjöttuð og vildi ekki gefa skítugri hendi fimmu,“ segir Sólveig Lára og hlær.