Gréta Salóme fer í Eurovision

Lagið Hear THem Calling verður framlag Íslendinga í Eurovision í ár. Lagið er flutt af Grétu Salóme Stefánsdóttur og er eftir hana sjálfa en hún samdi einnig texta lagsins.

Gréta Salóme atti kappi í einvígi við Öldu Dís með lagið Now en þangað komust þær með atkvæðum frá dómnefnd sem hafði helmingsvægi á móti símakosningu áhorfenda. Afar mjótt var á munum í fyrri kosningunni en aðeins munaði 78 atkvæðum á lögunum.

Gréta Salóme hefur áður flutt framlag Íslands í Eurovision en árið 2012 fór hún út fyrir Íslands hönd ásamt Jóni Jósepi Sveinbjörnssyni, betur þekttum sem Jónsa í svörtu fötum. Lagið Never forget komst upp úr undanúrslitinum og hafnaði í 2ö sæti með 46 stig.

Söngvakeppni evrópskra sjónvarpsstöðva, Eurovision, fer fram í Stokkhólmi í Svíþjóð í maí næstkomandi. Fyrri undanriðillinn fer fram 10. maí en sá seinni 12.maí. Úrslitin verða laugardaginn 14. maí og verður spennandi að sjá hvort Íslendingar munu eiga fulltrúa þar. Þetta er 61. sinn sem Eurovison-keppnin er haldin en hún fór fram í fyrsta skiptið í Sviss 24. maí árið 1956.